MATEMATIKA MANIPULATIBOAREKIN JOLASEAN

Kaixo lagunak!

Praktikaldia amaitzear den honetan, azkeneko egun hauetan izan dudan esperientziari buruz hitz egin nahi dizuet. Dakizuen bezala, matematika manipulatiboa asko gustatzen zaidan gaietako bat da. Hori horrela izanik, gaurkoan matematika manipulatiboa abiapuntu hartuta egin ditugun jolasei buruz hitz egingo dizuet. Ikasgelan talde txikitan (4 ikasle talde bakoitzean) jolas kooperatiboak landu ditugu. Jolas horietako hiru matematika manipulatiboaren erabilera eginez izan da.

Jolasetako bat hamarrekoak lantzeko helburuarekin proposatu dugu. Jolas horretan, lehenengo hamarreko poltsatxoak egin dituzte ikasleek. Ikasle bakoitzak 10 poltsatxo egin ditu.Poltsatxoak egin ondoren, nik zenbaki bat ematen nien ikasle bakoitzari eta zenbaki hori osatzeko zenbat hamarreko eta zenbat bateko behar dituzten irudikatu dute. Horrela zenbaki bat baino gehiagorekin, hamarrekoen kontzeptua behin baino gehiagotan landuz.

Bigarren jolasa batuketak eta kenketak lantzeko helburuarekin proposatu dugu. Horretarako, lehen gizakiaren gaia lantzen ari garenez eta hauek harrien erabilera handia egiten zutela abiapuntu hartuta, harrietan batuketa eta kenketa batzuk irudikatu ditugu, beste harri multzo batean hauen emaitzak irudikatu ditugularik. Ikasleek, harrietan proposatzen ziren batuketa eta kenketa horien emaitza kokatu behar zuten ondoan.

Hirugarren jolasa bikoitiak eta bakoitiak lantzeko izan da. Horretarako, irakasleak arebelan bi zutabe egin ditu, batean bakoitiak eta bestean bikoitiak idatzi duelarik. Ondoren, ikasleak banaka euren mahaietatik altxa eta irakasleak ematen zion zenbakia zutabe horietako batean kokatu behar zuen. Horretan laguntzeko, arbelean bertan kokatuta dagoen zenbakien taularen erabilera egin dute. Taula horretan bakoitiak zuriz margotuta daude, bikoitiak aldiz, horiz.  

  

Jolas hauek egitean, ikasleekin harrituta gelditu naizela esan behar dut. Praktikaldi guztian zehar manipulatiboki landu duguna ulertu dutela konturatu naiz jolas hauek egin ditugunean. Kontzeptuak barneratu dituzte eta jolasak egiteko ez dute inongo zailtasunik izan. Oso pozgarria izan da  nire praktikaldian zehar izan duten garapena ikustea. Bestalde, matematika manipulatiboki lantzea oso esanguratsua dela konturatu naiz. Ikasleek kontzeptuak hobeto ulertzeko bidea dela ikasi dut eta honen erabilera gehiagotan egitea beharrezkoa dela hausnartu dut.

Praktikaldian izandako esperientzia guztia kontuan izanda, matematika manipulatiboari buruz gehiago jakiten eta ikasten jarraitzeko motibazioa piztu zait. Aurrerantzean gai honen inguruan formakuntzak jasotzen jarraitzea gustatuko litzaidake.

Beste bat arte lagunak!